Qytetarë të shumtë janë mbledhur të dielën dhe kanë protestuar fillimisht pranë sheshit Skëndërbej dhe më pas kanë marshuar drejt kryeministrisë, me rastin e Ditës Ndërkombëtare të Punës.
Ata kanë kërkuar paga më të larta dhe masa shtesë nga qeveria për menaxhimin e krizës së rritjes së çmimeve.
Në lidhje me këtë protestë ka reagur edhe Presidenti Ilir Meta, i cili përmes një postimi në Facebook, Kreu i Shtetit shkruan se kjo nuk mund të jetë vetëm një ditë feste, por një moment reflektimi për të gjitha kushtet e punës në Shqipëri.
Sipas Metës, puna jo e mirëpaguar, pa kontratë të rregullt dhe pa kontribute pensioni, e zhvesh punëtorin nga dinjiteti dhe e vendos në një marrëdhënie shfrytëzimi.
Postimi i Ilir Metës në Facebook:
1 Maji nuk mund të jetë thjeshtë një ditë feste, por një moment reflektimi për të gjitha ditët dhe kushtet e punës në Shqipëri.
Puna jo e mirëpaguar, pa kontratë të rregullt dhe kontribute pensioni, pa sigurim shëndetësor dhe të drejta për pushim me pagesë e zhvesh punëtorin nga dinjiteti dhe e vendos në një marrëdhënie shfrytëzimi.
Kjo situatë duhet të marrë fund! Pasojat e rënda dhe afatgjata të pandemisë dhe luftës në Ukrainë, në veçanti rritja abuzive e çmimeve, e shtrojnë më me forcë këtë domosdoshmëri, në veçanti për rritjen e pagës minimale, garantimin e kushteve në vendin e punës dhe të çdo të drejte që siguron mirëqenie dhe drejtësi sociale.
Të dëgjojmë me përulësi zërin e punëtorëve!